Бишкекте залкар композитор Мураталы Бегалиевдин 70 жылдык маараке кечеси өттү (видео)

Кечээ, 6-декабрда белгилүү композитор, Кыргыз Республикасынын Эл артисти, Токтогул атындагы мамлекеттик сыйлыктын лауреаты, профессор Муратбек Бегалиевдин 70 жылдык мааракеси белгиленди. Бул тууралуу Маданият министрлигинен билдиришти.

Мааракелик иш-чарага Маданият, маалымат жана жаштар саясаты министри Мирбек Мамбеталиев, чет өлкөлөрдөн келген коноктор, коомдук ишмерлер жана маданият өкүлдөрү катышты. Министр композитордун улуттук музыканын өнүгүшүнө кошкон зор салымын белгилеп, анын чыгармачылыгы кыргыз маданиятынын дүйнөлүк аренада таанылышына өбөлгө болгонун айтты.

1993-жылдан тарта ал Кыргыз улуттук консерваториясын жетектеп, өлкөнүн профессионалдык музыкалык коллективдеринин калыптанышына жана Кыргызстанды дүйнөлүк маданий аянтчаларга чыгарууга чоң салым кошкон. Муратбек Бегалиевдин шакирттери бүгүн эл аралык деңгээлде ийгиликтерге жетишип, кыргыз музыкалык мектебинин беделин көтөрүп келишери маалыматта кошумчаланды.