Чүйдө 56 жаштагы киши жубайынын өлүмүнө себепчи болгон делип кармалды

Сокулукта 56 жаштагы киши жубайынын өлүмүнө себепкер болгон деген шек менен кармалды. Бул тууралуу Чүй облустук ички иштер башкармалыгы билдирди.

Маалыматка ылайык, 4 күн мурун, тагыраагы, 4-декабрда милицияга Арал айылындагы үйлөрдүн биринен 47 жаштагы жаран каза болгону тууралуу маалымат түшкөн. Окуя болгон жерге барган тергөө тобу маркумдун денесинен көптөгөн көк ала тактарды жана кан уюган издерди аныкташкан. Жансыз дене өлүкканага жөнөтүлгөн.

Дайындалган соттук-медициналык экспертиза маркумдун өлүмүнө жабык баш мээсинин жаракаты, башка жасалган соккудан пайда болгон жаракаттар себеп болгонун аныктаган. Факт боюнча Кылмыш-жаза кодексинин 130-беренеси (Ден соолукка оор залал келтирүү) менен кылмыш иши козголгон.

Шектүү катары маркумдун 56 жаштагы күйөөсү кармалып, убактылуу кармоочу жайга киргизилди. Тергөөдө жубайлар окуя алдында бирге спирт ичимдиктерин ичишкени, андан соң жолдошу жубайын токмокко алганы белгилүү болгон.

Учурда тергөө иштери уланууда.