Элчибек Жантаев жыйын өткөрүп, бир катар тапшырмаларды койду

Бүгүн, 9-декабрда мамлекеттик кызмат жана жергиликтүү өз алдынча башкаруу иштери боюнча мамлекеттик агенттиктин директору Элчибек Жантаев агенттиктин бөлүм башчылары жана орун басарларынын катышуусунда жыйын өткөрдү.

Мекеменин басма сөз кызматы билдиргендей, анда жергиликтүү өз алдынча башкаруу системиндеги көйгөйлөр, алардын чечүү жолдору жана алдыдагы багыттар талкууланды.

Директор жыйында аймактардагы штаттык бирдиктердин жетишсиздигин, кызматкерлердин маяналарын жакшыртуу маселесин, санариптик компетенциялардын төмөн деңгээли сыяктуу көйгөйлөрдү баса белгиледи.

"Санарип доордо жашап жатып, айрым айыл өкмөттөрдө санариптик көндүмдөргө ээ адистердин жоктугу - бул олуттуу көйгөй. Айрым аймактарда дагы деле кагаз ташып иш жүргүзүп жаткандар бар. Ошондуктан штаттык бирдиктерди кайра карап чыгып, заман талабына жооп берген, санарип технологияларын өздөштүргөн кадрларды тартууга көмөк көрсөтүшүбүз зарыл,”- деди ал.

Жантаев ошондой эле өлкө боюнча жалпы 264 жергиликтүү бийлик органы (анын ичинен 230 айыл өкмөт, 34 шаардык түзүмдөр) бар экенин белгилеп, алардын ар бири боюнча так жана санариптик форматта маалымат базасын түзүү зарылдыгын айтты.

Жыйындын жыйынтыгында директор бир катар протоколдук тапшырмаларды берди.