Бишкек жана Ош шаарларынын жаңы жылдык балатылары (видео)

Дагы 5 күндөн кийин, 15-декабрда Бишкектеги Ала-Тоо аянтындагы өлкөнүн негизги балатысы жандырылат. Учурда ага кызуу даярдык көрүлүүдө.

Бул жылы балатынын бийиктиги жылдызын кошкондо 35 метрге жетет. Аны жасалгалоо үчүн 7 миңге жакын оюнчук жана жарыктандыруучу жабдыктар колдонулган. Борбордук аянттагы балаты быйыл жарандардын ыңгайлуулугу үчүн кенен аймакка жылдырылып, оргумалардын айланасына муз аянты курулууда. Анын жалпы аянты былтыркыдан миң чарчы метрге чоң.

Негизги балаты быйыл көк жана күмүш түстөр менен кооздолууда.

Ал эми Ош шаарындагы балатынын бийиктиги жылдагыдан өзгөчөлөнгөн жок. Быйыл да анын узундугу 30 метрди түздү. Тендерден утуп алган компания 2 миллион 200 миң сомго жаңы жылдык балатыны жана анын айланасын кооздоо иштерин жүргүзүүдө.

Аны менен катар "Северное сияние" аймагы уюштурулуп, муз аянтчасы да даярдалууда.

Ал эми экинчи борбор калаадагы балаты кызыл түскө басым жасалып кооздолду. Жандыруу 14-декабрга пландаштырылууда.

Белгилей кетсек, Бишкек жана Ош шаарындагы балаты коюлган аймак электр энергиясын үнөмдөө максатында күн сайын саат 22:00гө чейин жандырылат.