"Сыртка чыгып иштегиле..." Жылынып отурган жол тескөөчүлөр башчысынан жеме угушту

Бүгүн, 10-декабрда Жол кыймылынын коопсуздугун камсыздоо башкы башкармалыгынын жетекчиси Азенбек Козукеев Бишкек-Ош унаа жолундагы Сосновка постун таң атпай күтүүсүз текшерди. Бул тууралуу аталган башкармалык кабарлап, видео жарыялады.

Анда анын бөлмөдө жылынып отурган кызматкерлерди сыртка чыгарып алып тилдеп жатканын көрүүгө болот. Козукеев жол тескөөчүлөрүнө кыштын күнү графикти өзгөртүп, коопсуздук үчүн ишти эрте баштоону тапшырды.

"Жүк ташуучу унааларга чектөө киргизилбеди беле? Силер бул жакта жылынып отурганда алар өтүп кетишсе эмне болот? Мындай аба ырайында иш тартибин өзгөртүп, саат 8 эмес, 7ге жылдырыш керек. Сыртка чыгып иштегиле, айдоочуларга түшүндүрүү иштерин жүргүзгүлө. Тосуш керек да”,- деген жетекчи.

Башкармалык тараткан маалыматта Азенбек Козукеев бул көрүнүш боюнча кызматтык иликтөө жүргүзүүнү тапшырганы да айтылат.