Президент Сауд Арабиясынын элчисин Ардак грамота менен сыйлады

Президент Садыр Жапаров бүгүн, 10-декабрда Сауд Арабиясынын Кыргызстандагы элчиси Ибрахим бин Ради Аль-Радини анын дипломатиялык миссиясынын аякташына байланыштуу кабыл алды. Бул тууралуу өлкө башчынын маалымат кызматы маалымдады.

Мамлекет башчысы элчиге жемиштүү ишмердүүлүгү жана эки өлкөнүн ортосундагы кызматташтыкты өнүктүрүүгө кошкон зор салымы үчүн ыраазычылык билдирди.

Президент ошондой эле Сауд өнүктүрүү фонду Кыргызстандагы маанилүү социалдык-экономикалык долбоорлорун ишке ашырууга активдүү катышкандыгын белгиледи.

Жапаров Кыргызстан менен Сауд Арабиясынын ортосундагы мындан аркы кызматташтык өз ара түшүнүшүү жана ишеним духунда өнүгө берерине үмүт артып, элчиге мындан аркы кесиптик ишине ийгиликтерди каалады.

Өз кезегинде элчи Падышалык Кыргызстан менен достук жана өнөктөштүк мамилелерин мындан ары да бекемдөөгө умтуларын ырастады. Ал эки өлкөнүн ортосундагы өз ара аракеттенүү жогорку деңгээлге жеткенин жана тереңдетүү үчүн чоң мүмкүнчүлүктөргө ээ экенин белгиледи.

Жолугушуунун соңунда Жапаров элчини Кыргызстан менен Сауд Арабиясынын ортосундагы достукту жана кызматташтыкты чыңдоого кошкон олуттуу салымы үчүн Кыргыз Республикасынын Ардак грамотасы менен сыйлады.