Болгария премьер-министри Росен Желязков массалык нааразычылыктардан кийин отставкага кетти

Болгариянын премьер-министри Росен Желязков жетектеген өкмөт нааразычылык акцияларынын күчөшүнөн кийин отставкага кетти.

Чет элдик басылмалар билдиргендей, шаршемби күнү кечинде өлкөнүн көп шаарларында миңдеген адамдар көчөгө чыгып, Софиянын борборундагы Эгемендүүлүк аянтын толтурушкан. Акцияга 100 миңге чейин жаран катышып, парламент имаратында "өкмөт кетсин" деген ураандар айтылды.

Нааразычылык митинги өткөн жумада президент Румен Радев тарабынан да колдоого алынган. Ал өкмөттү кызматтан кетүүгө ачык чакырган.

Желязков отставкага кетүү чечимин парламенттеги кезектеги ишеним көрсөтпөө добуш берүүсүнүн алдында жана Болгариянын евроаймакка киришине 20 күн калганда кабыл алды. Өкмөт январдан бери бийликте болуп, коррупция боюнча сындардын чордонунда калган. Нааразычылыктардан кийин өкмөт келерки жылга карата талаш жараткан бюджет долбоорун да артка чакыртып алган.