Австралиядагы пляжда атылган октон кеминде 10 адам каза болду

Австралиянын Сидней шаарындагы Бонди-Бич пляжында белгисиз адамдар тарабынан атылган октон кеминде 10 киши каза таап, бир нече жаран жарадар болду. Бул тууралуу дүйнөлүк басылмалар жазышууда.

SHOT телеграм каналы окуя еврейлердин Хануки майрамын белгилөө маалында болгонун жазды. Каза болгондордун арасында балдар дагы бар экени айтылууда.

Жергиликтүү басылмалар учурда 11 адам жаракат алганын, алардын экөө полиция кызматкерлери экенин кабарлады. Ал эми кол салгандардын бири өлтүрүлүп, экинчиси жарадар абалында кармалган. Полиция элди аймактан оолак болууга жана пляж аймагындагыларды баш калкалоочу жай издөөгө чакырды.

Белгилей кетсек, Сиднейдеги Бонди-Бич пляжы - Австралиянын белгилүү жайларынын бири. Ага көптөгөн серфинг жана сууда сүзүүнү сүйүүчүлөр, ошондой эле туристтер барышат.