"Кытай-Кыргызстан-Өзбекстан" темир жолун куруу долбоорун каржылоо үчүн макулдашууга кол коюлду                 

Бүгүн, 16-декабрда Суу ресурстары, айыл чарба жана кайра иштетүү өнөр жайы министри Бакыт Төрөбаев "Кытай-Кыргызстан-Өзбекстан" темир жолун куруу долбоорун каржылоо үчүн насыялык макулдашууга кол коюу аземине катышты.

Министрлер кабинети кабарлагандай, макулдашууга "Кытай-Кыргызстан-Өзбекстан" темир жолу компаниясы" ЖЧКсы (Биргелешкен долбоордук компания) менен Кытайдын мамлекеттик өнүктүрүү банкынан жана ЭксимБанкынан турган Кытайдын Банктар Синдикаты кол койгон.

"Кытай-Кыргызстан-Өзбекстан" темир жол долбоорунун баасы 4,7 миллиард доллар деп бааланган. Бул сумманын тең жарымын Кытай 2,3 миллиард доллардын тегерегиндеги каражатты үч өлкө түзгөн Биргелешкен долбоордук компанияга 35 жылга насыя катары берүүдө.

Бул насыяны Кытай, Кыргызстан жана Өзбекстан мамлекеттеринин Биргелешкен долбоордук компаниясы төлөйт. Ал эми калган 2,3 миллиард долларды үч мамлекет чогуу чыгарат, сумманын 51 пайызын Кытай берсе, Кыргызстан менен Өзбекстан ар бири 24,5 пайыздан чыгарат", - деп айтылат маалыматта.