Ашуулардагы абал: Төө-Ашууда чектөө алынды, Ала-Белде күчүндө

Бүгүн, 17-декабрь саат 10:00гө карата өлкөнүн бардык ашууларында унаа кыймылы үчүн жол ачык. Бул тууралуу Транспорт жана коммуникациялар министрлигинен билдиришти.

Маалыматка ылайык, буга чейин Бишкек – Ош унаа жолунун Төө-Ашуу ашуусунда (Сосновка постунан) оор жүк ташуучу унааларга киргизилген убактылуу чектөө алынган. Азыркы тапта №9 Жол тейлөө ишканасы тарабынан жолду тазалоо жана инерттик материалдарды себүү иштери жүргүзүлүүдө.

Ошол эле учурда Ала-Бел ашуусунда аба ырайынын начарлашына байланыштуу бороон болуп, оор жүк ташуучу унааларга карата киргизилген чектөө күчүндө калууда. Бул боюнча кошумча маалымат берилери айтылды.

Белгилей кетсек, өлкөнүн жети дубанынын жолдорунда Жол тейлөө ишканалары тарабынан жолду кардан тазалоо жана кум-туз аралашмасын чачуу жумуштары үзгүлтүксүз аткарылып жатат.

Транспорт жана коммуникациялар министрлиги айдоочуларды унаа дөңгөлөктөрүн кышкыга алмаштырууга, керектүү шаймандарды ала жүрүүгө жана жол кыймылынын эрежелерин так сактоого чакырат.