Президент депутаттарды "жыйынга министр өзү келсин" дей бербөөгө чакырды

Бүгүн, 17-декабрда Жогорку Кеңештин VIII чакырылышынын депутаттары ант берип, ишин баштады. Жыйында сөз сүйлөгөн президент Садыр Жапаров депутаттарга кайрылып, парламенттин жыйындарына ар дайым эле "министрлер өзү келсин" деген талапты коюп, чакыра бербөөнү өтүндү.

"Комитет, фракция жыйындарына ар дайым эле "министрлер өзү келсин" деген талапты коюп, чакыра бербешиңиздерди өтүнөм. Албетте, айрым учурларда министрлер өздөрү келиши керек болгон мыйзам долбоорлору болот. Бирок башка учурларда алардын орун басарлары менен иштешсеңиздер",- деди президент.

Жапаров ошондой эле министрлер керек болсо 24 саат бою, айрым учурда түнү дагы иштей турган убактары болорун айтты.

"Күндүз зарыл учурларда чакырып калсам, "Жогорку Кеңештемин", "комитеттин же фракциянын жыйынындамын" деп күндө эле ушул жерде жүрүшөт. Министр деген - министрликтин ишин алдыга жылдырыш керек",- деп кошумчалады өлкө башчысы.