Бишкекте бокс боюнча өлкө биринчилиги өтүүдө

Бүгүн, 17-декабрда 2008-2009-жылдары төрөлгөн улан-кыздар арасында бокс боюнча Кыргызстандын биринчилиги өтүүдө. Бул тууралуу Дене тарбия жана спорт мамлекеттик агенттигинин басма сөз кызматы билдирди.

Маалыматка ылайык, иш-чаранын негизги максаты - жаштар арасында бокс спортунун абалын аныктоо жана мыкты мушкерлерди тандап алуу, өлкөнүн улуттук курама командасын түзүү, боксту өнүктүрүү жана жаштар арасында спорттун бул түрүнүн популярдуулугун арттыруу болуп саналат.

Мелдешке өлкөнүн бардык аймактарынан келген мушкерлер катышууда.

Бокс боюнча биринчилик эл аралык эрежелерге ылайык, балдар арасында 10 салмактык категория боюнча өтүүдө: 50, 55, 60, 65, 70, 75, 80, 85, 90 жана 90 килограммдан жогору. Кыздар арасында 9 салмак категориясында 48, 51, 54, 57, 60, 65, 70, 75 жана 80 килограммга чейинки салмак чендеринде беттештер өтөт.

Мелдештер 21-декабрга чейин уланат. Жыйынтыгында жеңүүчү мушкерлерге медаль жана дипломдор тапшырылат.