"Духу жетпей жатат". Сурабалдиева төрагага жооп берди

Жогорку Кеңештин 18-декабрдагы жыйынында комитеттердин төрага орун басарларын шайлоо учурунда талаш-тартыштар жаралды.

Депутат Элвира Сурабалдиева парламент төрагасы Нурланбек Тургунбек уулуна кайрылып, кечээ парламент спикерин, вице-спикерлерди жана комитет трагаларын шайлоо "альтернативасыз өткөнүн" эске салып, ишти ошондой эле уланта берүүнү талап кылды.

"Бүгүн комитеттердин орун басарларын шайлоо жүрүүдө. Кечээ диктатура, бүгүн демократия болуп калыптыр. Депутаттардын ортосунда ызы-чуу чыкпашы үчүн, талапкерлерди альтернативасыз белгилеп коюуңуздарды суранам",- деди Сурабалдиева.

Парламент төрагасы Тургунбек уулу Элвира Сурабалдиева эч кандай депутаттык топко кирбегени үчүн акыркы чечимдерден кабарсыз калганын айтып, ар бир комитетке үч талапкер гана сунушталарын белгиледи. Ал ошондой эле "түндүк-түштүк" деген маселеге орун жок экенин, парламент трибунасынан мындай сөздөр айтылбашы керектигин эскертти.

Сурабалдиева калыс пикирин билдиргенин белгилеп, "мени коркутпаңыздар" деди.

"Мен айткан сөздү айтууга айрымдардын, балким, дарамети же духу жетпей жатат. Мен ачык айткан депутатмын. Анан мени бул же тиги топко кир деп мажбурлай албайсыз",- деп кошумчалады Сурабалдиева.

Талкууга депутаттар Умбеталы Кыдыралиев менен Бурун Аманова да катышып, аймактык бөлүнүү болбогонун белгилешти.