Кыргызстандыктардын карталарынан 11 миллионго сомго жакын акча жоголду

Быйыл июль-сентябрь айларында коммерциялык банктар 640тан ашык уруксатсыз операцияны каттап, кардарлар 11 миллион сомго жакын зыянга учурады. Бул тууралуу коммерциялык банктардын маалыматында көрсөтүлгөн.

Маалыматка ылайык, эң көп зыян Visa карталарынын ээлеринде катталган — 522 учур, 9,4 миллион сом. Андан кийин MasterCard карта ээлери — 87 операция, 209 миң сом жана Элкарт карталары — 32 уруксатсыз операция аркылуу 1,33 миллион сом жоголгон.

Мындан улам өткөн жылга салыштырмалуу (729 учур, 10,1 миллион сом) быйылкы учурлардын саны (641) азайганы менен, кардарлардын жалпы зыяны 10,9 миллион сомду түзгөн.

Экинчи кварталга салыштырмалуу, үчүнчү кварталда уруксатсыз операциялар 31 пайызга көбөйүп, 5,2 миллион сомдон ашты. Ошондой эле 23 учур чет элдик банктардын карталары менен катталган, зыян 18,6 миң сомду түздү.

Бардык учурлар боюнча банктар кардарлардын акчасын кайтарууга аракет кылууда. Бирок карталык алдамчылык төлөм системасынын негизги көйгөйлөрдүн бири бойдон калууда.