Өкмөт башчы Чүйдө суу сактагычтын курулушун баштап берди

Бүгүн, 18-декабрда министрлер кабинетинин төрагасы Адылбек Касымалиев Чүйдүн Москва районундагы Ак-Суу дарыясында декадалык жөнгө салуучу бассейндин курулушуна мезгил кутучасын салуу аземине катышты.

Өкмөттүн маалыматы кызматы кабарлагандай, Касымалиев президент өлкөнүн ирригация тармагын өнүктүрүүгө артыкчылыктуу маани берерин белгилеген.

"Калкты сугат суу менен камсыз кылуу максатында республика боюнча 44 ирригациялык объектинин курулушу пландаштырылган. Бүгүнкү күндө 10 объект толугу менен реконструкцияланып, пайдаланууга берилди, натыйжада 5 680 гектар жаңы сугат жерлери өздөштүрүлдү, 37 953 гектар сугат жерлеринин суу менен камсыз болуусу жакшыртылды жана 12 253 гектар жердин мелиоративдик абалы жакшыртылды.

Суу ресурстарын натыйжалуу пайдалануу көйгөйлөрүн чечүү максатында 2024–2030-жылдары жалпы көлөмү 953,74 миллион куб метрди түзгөн суткалык жана декадалык жөнгө салуучу 106 бассейнди (СЖБ, ДЖБ) куруу пландаштырылган. Алардын ичинен Чүй облусу боюнча жалпы сыйымдуулугу 188,4 миллион куб метрди түзгөн 27 СЖБ жана ДЖБ куруу каралган", - деген ал.

Министрлер кабинетинин төрагасы Ак-Суу дарыясындагы көлөмү 4,5 миллион куб метр болгон декадалык жөнгө салуучу жаңы бассейни Ак-Суу дарыясынын системасындагы бардык сугат жерлерин толук кандуу суу менен камсыздоого мүмкүндүк берерин кошумчалаган.

"Натыйжада төрт айыл аймагынын 6 500 гектар сугат жеринин суу менен камсыз болуу деңгээли жогорулайт. Долбоорду ишке ашыруу аймактын айыл чарбасынын өнүгүшүнө оң таасирин тийгизип, чарбалардын жыргалчылыгын жогорулатууга өбөлгө түзөт, ошондой эле аймактын социалдык-экономикалык секторунун өнүгүшүнө түрткү берет", - деп айтылат маалыматта.