Апрелден тарта мугалимдер менен дарыгерлердин маянасы 50 пайызга көтөрүлөт (видео)

Кийинки жылы мугалимдер менен дарыгерлердин айлык акысы 50 пайызга көтөрүлөт. Бул тууралуу өкмөт башчы Адылбек Касымалиев "Ала-Тоо 24" телеканалына маек берип жатып билдирген.

Анын айтымында, кийинки жылы өлкөдөгү айрым кызматкерлердин маянасы эки этап менен көтөрүлөт.

"Кийинки жылга чоң пландарды койдук. Эки этап менен айлык акыларды көтөрүп беребиз. Биринчи этапта 1-апрелден тарта мугалимдердин, дарыгерлердин, маданий кызматкерлердин жана тейлөө кызматкерлеринин айлык акысын 50 пайыздан кем эмес көтөрөбүз. Ал эми экинчи этап менен 1-сентябрдан баштап, муниципалдык кызматкерлердин айлыгын 50 пайызга чейин көтөрүп беребиз. Буга бюджеттен кошумча 39 миллиард сом керектелет", - деген өкмөт башчы.

Ошондой эле Адылбек Касымалиев жакын арада пенсия маселеси дагы карала турганын кошумчалаган.

"Пенсия маселеси дагы көп көтөрүлүүдө. Бул багытта дагы иштерди алып баруудабыз. Алдыда сезиле тургандай кылып көтөрөбүз", - дейт Касымалиев.