Ошто алгачкы ирет боор алмаштыруу операциясы жасалды

Кыргызстандын түштүк аймагында биринчи жолу боор алмаштыруу операциясы Ош мамлекеттик университетинин Медициналык клиникасында жасалды. Бул тууралуу бүгүн, 19-декабрда окуу жайдын маалымат кызматы билдирди.

Маалым болгондой, элүү жаштагы бейтапка 25 жаштагы уулу донор болду.

Операция акысыз жасалды. Аны окуу жайдын тажрыйбалуу дарыгери Бексултан Сейтбек уулу Орусиядан чакыртылган адистер менен биргеликте жасады. Операция президент Садыр Жапаровдун Кыргызстанда орган алмаштыруу тармагын өнүктүрүү боюнча берген тапшырмасынын негизинде жана саламаттык сактоо министринин колдоосу менен жүргүзүлдү.

Бүгүн, 19-декабрда операциядан кийин саламаттык сактоо министри Каныбек Досмамбетов бейтаптан кабар алды. Министр мындай оор операциялардын түштүк аймагында жасалышы Кыргыз медицинасы үчүн маанилүү экенин белгилеп, мүмкүнчүлүктөр дагы да кеңейерине токтолду.