Жалпы жаза 50 жылдан ашык. Пакистандын мурдагы премьер-министри жана анын жубайы дагы соттолду

Пакистандын соту өлкөнүн камактагы мурдагы премьер-министри Имран Ханды жана анын жубайы Бушра Бибини коррупциялык ишке күнөөлүү деп таап, 17 жылга эркинен ажыратты. Бул тууралуу чет элдик басылмалар жазышты.

Саясатчы менен анын жубайына 2021-жылдын май айында Сауд Арабиянын бийликтери белек кылган кымбат баалуу зер буюмдарын номиналдык баада сатып алган деп айыпталышкан. Тагыраагы, Пакистандын мурдагы премьер-министри буюмдарды мамлекеттик сактоочу жайга сактоонун ордуна жеке колдонуу үчүн сактап, 285 миң долларга бааланган зер буюмдары үчүн болгону мамлекетке 10,3 миллион доллар төлөгөн.

Ошондой эле сот айыпталуучуларга 58 миң 500 доллар өлчөмүндө айып салган.

Эске салсак, Хан 2023-жылы да коррупциялык ишке айыпталып, 14 жылга эркинен ажыратылган. Ушул эле айып менен анын аялы 7 жылга кесилген. Абактагылар мурунку мөөнөтү бүткөндөн кийин жаңы мөөнөттөрүн өтөй башташат. Муну менен мурдагы премьер-министр Хан 31 жылга, анын жубайы Бушра Биби үчүн 24 жылга эркинен ажыратылды.

Хан 2018-2022-жылдары Пакистандын премьер-министри болуп иштеген. Ал 2022-жылдын 10-апрелинде парламентте ишеним көрсөтпөө боюнча добуш берүүдөн кийин кызматтан алынган.