Чет өлкөдө фамилиясын өзгөрткөндөр боюнча мыйзам иштелип чыкты

"Жарандык абалдын актылары жөнүндө" мыйзамга өзгөртүүлөрдү киргизүүнү караган мыйзам долбоору коомдук талкууга коюлду.

Президенттин иш башкармалыгы иштеп чыккан документ өлкө аймагында туулуп, чет өлкөдө жүргөн жана ал жакта фамилиясын өзгөрткөндөрдүн алмашылган аты-жөнүн мамлекеттик каттоого алууну көздөйт.

Тагыраагы, чет мамлекеттердин тиешелүү органдары тарабынан берилген фамилиясын өзгөртүү жөнүндө расмий документтердин негизинде мурда өлкө аймагында түзүлгөн жарандык абалдын актыларынын тиешелүү жазууларына өзгөртүүлөр киргизилет. Өзгөртүүдөн кийинки жаңы күбөлүк фамилиясын алмаштырган адамга берилет же чет мамлекеттин тиешелүү органдары аркылуу берүү үчүн жөнөтүлөт.

"Миграциялык агымдын өсүшү, Кыргызстан жарандарынын КМШ өлкөлөрүндөгү социалдык, үй-бүлөлүк жана эмгек процесстерге активдүү катышуусу, алар тараптан аты-жөнүн өзгөртүү жөнүндө суроо-талаптардын көбөйүшүн эске алганда бир түрдүү укуктук жөнгө салуунун зарылдыгы өтө актуалдуу болууда", - деп жазылат документтин негиздеме-маалымкатында.