Анкарада Кыргыз-Түрк кинематографиялык кызматташтыгы талкууланды

Маданият, маалымат жана жаштар саясаты министринин орун басары Марат Тагаев Түркиянын Маданият жана туризм министрлигинин кинематография иштери боюнча департаментинин башкы директору Бирол Гювен менен жолугушту. Бул тууралуу 22-декабрда мекеменин басма сөз кызматы билдирди.

Берилген маалыматка ылайык, жолугушуу Түркиянын Анкара шаарында өткөн Түрк тилдүү мамлекеттердин жалган маалыматтарга каршы күрөшүү форумунун алкагында орун алды.

Жолугушууда тараптар кинематография тармагында кызматташтыкты өнүктүрүүнүн актуалдуу маселелерин талкуулап, биргелешкен кинодолбоорлорду ишке ашыруунун келечегин, жана аудиовизуалдык контент аркылуу түрк элдеринин маданий жана тарыхый мурастарын илгерилетүү маселелерин талкуулашты.

Мындан тышкары, позитивдүү маалыматтык мейкиндикти калыптандырууда, гуманитардык байланыштарды чыңдоодо жана азыркы шарттарда жалган маалыматтарга каршы турууда киноиндустриянын ролуна өзгөчө көңүл бурулду.

Жолугушуунун жыйынтыгында тараптар Кыргыз Республикасында Түркиянын кино күндөрүн, Түркияда Кыргызстандын кино күндөрүн өткөрүүнү макулдашышып, профилдик мекемелердин ортосундагы өз ара аракеттешүүнү мындан ары тереңдетүүгө жана практикалык кызматташтыкты кеңейтүүгө кызыкдар экендиктерин билдиришти.