Иран АКШ чабуул койсо, Перс булуңундагы америкалык базаларга сокку урарын билдирди

АКШ тарабынан чабуул жасалган учурда Иран Перс булуңу аймагындагы америкалык аскердик базаларга жооп кайтарарын билдирди. Бул тууралуу Ирандын тышкы иштер министри Аббас Аракчи Al Jazeera телеканалына берген маегинде айтты.

Анын айтымында, Ирандын АКШнын аймагына түз сокку уруу мүмкүнчүлүгү жок. Бирок Вашингтон Иранга кол салса, Тегеран аймактагы америкалык объектилерди бутага алат.

"Эгер АКШ бизге кол салса, биз анын аймактагы базаларына чабуул коёбуз", — деди Аракчи. Ал ошондой эле америкалык аскерлер жайгашкан өлкөлөрдүн аймагындагы базалар да соккуга кабылышы мүмкүн экенин белгиледи.

Министрдин билдирүүсү Жакынкы Чыгыштагы чыңалуу күчөп турган шартта жасалды. Бул аймакта АКШнын бир катар аскердик объектилери жайгашкан.