Кеминде тергөө кызматынын башчысы кармалды

УКМК тарабынан Кемин райондук ички иштер башкармалыгынын тергөө кызматынын башчысы Б.М.Б. кармалды. Бул тууралуу атайын кызмат 14-февралда маалымат таратты.

Билдирүүгө караганда, ал жашы жете элек кызды зордуктоо иши боюнча экспертиза үч адамдын (Н.Э., С.Б., К.Ө.) тиешеси бар экенин көрсөткөнүнө карабастан, эки шектүүнү кылмыш жоопкерчилигинен бошотуп, аларга карата ишти кыскартып койгон.

"Белгилей кетсек, Б.М.Б. өзүнүн кылмыштуу максаттарына жетүү жана мыйзамсыз чечимин мыйзамдаштыруу максатында өспүрүм баланы С.Б. жана К.Ө.нүн пайдасына атайылап жалган көрсөтмө берүүгө мажбурлаган", - деп жазылат маалыматта.

Бишкек шаарынын Октябрь райондук сотунун чечими менен шектүү УКМКнын тергөө абагына камакка алынды.

Мындан тышкары УКМКнын тергөө органдары тарабынан өспүрүм кызды зордуктоо фактысы боюнча кылмыш ишинин материалдары да тергелет.