Министр Мирбек Мамбеталиев аксакалдар институту менен кызматташат

Бүгүн, 16-февраль күнү Маданият, маалымат жана жаштар саясаты министри Мирбек Мамбеталиев “Даанышман Аксакалдар Ордосу” коомдук бирикмесинин өкүлдөрү менен жолугушту.

Маданият, маалымат жана жаштар саясаты министрлигинен билдиришкендей, жолугушууда президент Садыр Жапаров демилгелеген “Улуттук дем — дүйнөлүк бийиктик” концепциясынын алкагында улуттук баалуулуктарды сактоо, жаштарды руханий-адеп-ахлактык жактан тарбиялоо жана коомдук тарбия иштерин күчөтүү маселелери талкууланды.

Министр аксакалдар институтунун коомдогу ролу маанилүү экенин белгилеп, тарбиялык багыттагы демилгелерди колдоого даяр экенин билдирди. Ошондой эле Ош облусунун тургуну Камалдин Алымкулов аксакалдын жаштардын дене тарбиясын өнүктүрүүгө багытталган экологиялык таза гантелдерди жасоо долбооруна колдоо көрсөтүү маселеси каралары айтылды.

Өз кезегинде аксакалдар министрликке ыраазычылык билдирип, жаштар арасында улуттук наркты жайылтуу жана тарбиялык иштерди күчөтүү боюнча кызматташууну улантууга даяр экендиктерин билдиришти.