Чүйдө бычак менен жаракат келтирүүгө шектелген эки жаран кармалды

Чүйдө бычак менен жаранга жаракат келтирген деп 22 жаштагы эки жигит кармалды. Бул тууралуу облустук милиция билдирди.

Маалым болгондой, 14-февралда болжол менен саат 00:30 чамасында Т.М., Т.Ж. жана К.К. аттуу жарандар мас абалында Бишкек шаарынан Петровка айылына барган. Фрунзе көчөсүндө алар А.Э. аттуу жаран жана анын тааныштары менен жолугушуп, алардын ортосундагы оозеки жаңжал мушташка айланган. Мушташ учурунда Т.М. аттуу жаран А.Э.ге бычак сайып, жаракат келтирген. Окуядан кийин шектүүлөр Honda үлгүсүндөгү автоунаа менен окуя болгон жерден качып кетишкен.

Аталган факт Кылмыш-жаза кодексинин 280-беренеси (Бейбаштык) боюнча кылмыш иши козголду.

Натыйжада 2003-жылы туулган Т.Ж. жана Т.М., аттуу жарандар аныкталып, убактылуу кармоочу жайга киргизилди. Тергөө уланууда.