Парламент комитети Солтобаевди транспорт министри кызматына дайындоого макулдук берди

Бүгүн, 17-февралда Жогорку Кеңештин Өнөр-жай саясаты, транспорт, отун-энергетикалык комплекс, архитектура жана курулуш боюнча комитети Талантбек Солтобаевди транспорт жана коммуникациялар министри кылып дайындоого макулдук берүү маселесин карады.

Жыйында президенттин жана министрлер кабинетинин Жогорку Кеңештеги ыйгарым укуктуу өкүлүнүн орун басары Нурлан Бообеков талапкер тууралуу маалымат берди.

Талкуу маалында депутаттар өлкө боюнча автомобиль жолдорун, социалдык объекттерди куруу жана оңдоо иштеринин өз убагында бүтүрүлүшүнө өзгөчө көңүл бурушту.

Жыйынтыгында комитет Талантбек Солтобаевди транспорт министринин кызмат ордуна дайындоого макулдук берип, Жогорку Кеңештин кароосуна жиберди.

Белгилей кетсек, Солтобаев транспорт жана коммуникациялар министринин милдетин аткаруучу болуп 16-февралда дайындалган.