Садыр Жапаров Токаев менен телефон аркылуу сүйлөштү

Бүгүн, 17-февралда өлкө башчы Садыр Жапаров Казакстандын президенти Касым-Жомарт Токаев менен телефон аркылуу сүйлөштү. Бул тууралуу президенттин басма сөз кызматы билдирди.

Маалыматка ылайык, анда мамлекет башчылары Кыргыз-Казак мамилелеринин бардык багыттары боюнча өз ара кызыкчылык туудурган актуалдуу маселелерди, анын ичинде соода, транспорт, өнөр жай кооперациясы, энергетика жана суу ресурстары тармактарында мурда жетишилген макулдашууларды ишке ашырууну талкуулашкан.

Ошондой эле Токаев Жапаровго Казакстанда жүргүзүлүп жаткан, мамлекеттин узак мөөнөттүү өнүгүүсүнүн өзөгүн түзгөн конституциялык реформа тууралуу маалымат берген. Ал эми Садыр Жапаров Казакстандагы масштабдуу өзгөрүүлөрдү, анын ичинде бир палаталуу парламентти түзүүнү колдой турганын билдирип, жалпы элдик референдумду ийгиликтүү өткөрүү тилектештигин билдирген.

"Президенттер ички саясий реформалар, чөлкөмдүк жана эл аралык күн тартибиндеги маселелер боюнча пикир алышып, муну менен бирге көп тараптуу форматта өткөрүлө турган алдыдагы биргелешкен иш-чаралардын графигин карап чыгышты",- деп жазылган маалыматта.