Жакынкы Чыгыштагы чыңалуу күчөдү. АКШ Иранга сокку урушу мүмкүн

АКШ ишемби күнү Иранга сокку урууга даяр. Бул тууралуу 18-февралда CBS News телеканалы билдирди.

"Улуттук коопсуздук боюнча жогорку даражалуу кызматкерлер президент Дональд Трампка аскерлер мүмкүн болгон соккуларга ишембиге даяр экенин маалымдашты. Бирок кандайдыр бир аракеттердин башталышы дагы жылышы мүмкүн",- деп билдирди телеканал булактарына таянып.

Маалыматка ылайык, Пентагондун айрым күчтөрү Жакынкы Чыгышка буга чейин эле жайгаштырылган. Ошол эле учурда Трамп акыркы чечимин кабыл ала элек.

Axios порталы 18-февралда АКШ менен Ирандын ортосунда аскердик кагылышуу ыктымалдыгы жогору экенин билдирген. Анда Израилдин өкмөтүндө Тегеранда режимди алмаштырууга багытталган максат бар экени жана согуштук аракеттерге даярдык көрүлүп жатканы айтылган.