Ошто ири өлчөмдөгү баңгизаттарды сатууга бөгөт коюлду (видео)

Ош шаарында ири өлчөмдөгү баңгизаттарды сатуу ишмердүүлүгүнө бөгөт коюлду. Бул тууралуу Ички иштер министрлигинин басма сөз кызматыны билдирди.

Маалыматка ылайык, ИИМдин Баңгизаттарды мыйзамсыз жүгүртүүгө каршы күрөшүү кызматынын облустагы кызматкерлери тарабынан Ош шаарындагы ооган тектүү кара куурай чайырын (гашиш) сатуу ишмердүүлүгүнө бөгөт коюлду.

Аталган факт Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) менен кылмыш иши козголгон.

Ыкчам-издөө иш-чараларынын негизинде 1995-жылы туулган С.О.Б. аттуу жарандын Дэу Нексия үлгүсүндөгү автоунаасынан 101 грамм кара куурай чайыры (гашиш) жана 155 миң сом өлчөмүндөгү акча каражаты табылган. Андан ары 1989-жылы туулган Д.С.С. аттуу жарандын жашаган дарегинде тинтүү жүргүзүлгөн. Натыйжада 4 килограмм 600 грамм гашиш, 2 даана РГД-5 үлгүсүндөгү граната, белгисиз үлгүдөгү колго жасалган ок атуучу курал, 51 даана ок, 2 миң доллар жана 87 миң сом акча каражаты табылды. Иш-чаралардын жүрүшүндө бул кылмыштуу топтун уюштуруучусу 1982-жылы туулган К.С.С. аттуу жаран экендиги аныкталып, ал жашаган үйдөн ооган тектүү гашиш (чарс) баңгизаты табылган. Кармалган жаран баңгилик кылмыштарды жасагандыгы үчүн чет мамлекеттер тарабынан бир нече жолу соттолгондугу аныкталган.