Эпштейндин мураскери 40ка жакын жабырлануучуга компенсация төлөп берүүгө даяр

Америкалык чуулгандуу финансист Жеффри Эпштейндин мыйзамдуу мураскери анын кордугуна кабылган 40ка жакын жабырлануучуга 35 миллион долларга чейин компенсация төлөп берүүгө макулдугун билдирген. Бул тууралуу Орусиянын РИА новости басылмасы жазды.

Андагы маалыматта Эпштейндин мыйзамдуу мураскери анын курмандыктары менен келишимге келе элек экени жазылган. Мураскер доо арыздарды чечүү үчүн 35 миллион долларга чейин төлөп берүүгө макул экенин билдирген.

Учурда Нью-Йорктогу сот тарабынан кеминде 40 аялдан турган топтун арыздары каралууда.

Белгилей кетсек, 2019-жылы Жеффри Эпштейнге АКШда жашы жете электерди сексуалдык эксплуатация максатында сатууга байланыштуу айып коюлуп, ага 40 жылга чейин эркинен ажыратуу коркунучу жаралган. Айыптоочулардын маалыматы боюнча, ал 2002-2005-жылдары ондогон жашы жете элек кыздар менен жыныстык байланышта болуп, кээ бирлерине жаңы кыздарды алып келүүгө буйрук берген. Айрым жабырлануучулардын 14 жашка да толо элек болгону айтылган.

Эпштейндин жансыз денеси 2019-жылы сот процесси жүрүп жатканда абактан табылган. Расмий маалыматтар боюнча, ал өзүнө кол салган. Бирок анын өлүмүнө байланыштуу көптөгөн божомолдор айтылып келет.