Феликс Кулов жарандарга Кытай-Кыргызстан-Өзбекстан темир жолунун акцияларын сатып алууну сунуштады

Кыргызстандын мурдагы премьер-министри Феликс Кулов Кытай—Кыргызстан—Өзбекстан темир жолунун курулушун каржылоого жарандарды тартууну сунуштады.

Анын айтымында, долбоордун жалпы наркы болжол менен 4,7 миллиард долларды түзөт. Бул ири инфраструктуралык долбоордо Кыргызстандын үлүшү болжол менен төрттөн бир бөлүгүн түзөт. Кулов мамлекеттик үлүштүн бир бөлүгүн калкка акция түрүндө сунуштоону демилгеледи.

"Мамлекет өзүнө тиешелүү үлүштүн 30 пайызга жакынын бөлүп, жарандарга аталган долбоордун аталыштагы акцияларын сатып алууну сунуштаса болот. Негизги пакеттин баасы 4–5 миң сомду түзүп, аны 4–6 жыл аралыгында тең бөлүп төлөө мүмкүнчүлүгү каралмак. Бул айына 60–90 сомдон туура келет жана калктын басымдуу бөлүгүнө жеткиликтүү болот", - деп жазды ал.

Экс-премьердин пикиринде, мындай ыкма мамлекетке тышкы карыздардын көлөмүн азайтууга жана экономикалык суверенитетти бекемдөөгө жардам берет. Ал эми жарандар үчүн бул туруктуу дивиденд алуу, инфляциядан коргонуу жана узак мөөнөттүү үй-бүлөлүк капитал топтоо мүмкүнчүлүгүн түзөт.