Окумуштуулар ракты дарылоого мышыктар жардам берерин аныкташты 

Британиялык Сэнгер институтунун окумуштуулары адамдардагы рак оорусу менен күрөшүүгө мышыктар жардам берерин аныкташты. Бул тууралуу чет элдик басылмалар жазышты.

Андагы маалыматтар боюнча, аталган жаныбарларда рак оорусуна алып келүүчү механизмдер адамдардыкына окшош болот. Мындан улам аларга анализ жүргүзүү менен оорунун келип чыгышын жана дарылоону аныктоого мүмкүн.

Анализ жүргүзгөн окумуштуулар беш өлкөдөн келген 500гө жакын үй мышыктарындагы шишиктердин ар кандай түрлөрүн анализдеген. Мисалы, изилдөөчүлөр мышыктардагы сүт безинин рагы менен адамдардагы сүт безинин рагы ортосунда окшоштуктарды табышкан. Мышыктар адамдар сыяктуу экологиялык коркунучтарга дуушар болушат, демек, рактын кээ бир себептери жалпы болушу мүмкүн.

Окумуштуулар мындай окшоштуктар келечекте мышыктарда, андан кийин адамдарда ракты дарылоо ыкмаларын аныктоого жардам бере турганын билдиришкен.