Бишкекте милиция кызматкерин сүзгөн айдоочу кармалды (видео)

Бишкек шаарында милиция кызматкерин сүзгөн айдоочу кармалды. Бул тууралуу 23-февралда Биринчи май РИИБинин басма сөз кызматы билдирди.

Маалыматка ылайык, 18-февралда саат 04:55 чамасында Лада Приора үлгүсүндөгү унаанын айдоочусу айдоочулук күбөлүгү жок унаа башкаргандыгы үчүн Манас көчөсүндө жайгашкан айып короого токтотулган. Административдик протокол түзүлүп жаткан учурда айдоочу айып короонун аймагынан, милиция кызматкерлеринин уруксатысыз унаанын рулуна отуруп, кызматкерлерди сүзүп кеткен.

Натыйжада милициянын кенже сержанты А.К. унаанын капотунда калып, болжол менен 20-30 метр аралыкка чейин сүйрөлгөн. Андан соң айдоочу окуя болгон жерден белгисиз багытта изин жашырып кеткен. Окуянын кесепетинен милиция кызматкери денесинен жаракат алган. Аталган факт боюнча Кылмыш-жаза кодексинин 280-беренесине (Бейбаштык) ылайык кылмыш иши козголгон.

Ыкчам-издөө иш-чараларынын жүрүшүндө 1995-жылы туулган А.С. аттуу жаран кармалган. Учурда тергөө иштери улантылууда.