Кытай АКШны бир тараптуу соода бажы төлөмдөрүн жоюуга чакырды

Кытай АКШны соода өнөктөштөрүнө карата киргизилген бир тараптуу бажы төлөмдөрүн жокко чыгарууга чакырды. Бул тууралуу дүйшөмбү күнү Кытайдын Коммерция министрлиги билдирип, АКШнын Жогорку соту чыгарган чечимге комментарий берди.

Министрликтин билдирүүсүндө кызматташтык Кытай менен АКШ үчүн тең пайдалуу экени, ал эми каршылашуу эки тарапка тең зыян алып келери белгиленген. Ошондой эле Бээжин Вашингтон кошумча тарифтерди сактап калуу максатында альтернативдүү чараларды, анын ичинде соода иликтөөлөрүн даярдап жатканы тууралуу маалыматтарга көңүл буруп жатканын билдирди. Кытай бул маселени кылдат көзөмөлдөп, өз кызыкчылыктарын чечкиндүү коргой турганын кошумчалады.

20-февралда АКШнын Жогорку соту 2025-жылдын апрелинде президент Дональд Трамп киргизген глобалдык тарифтерди мыйзамсыз деп тапкан. Соттун чечиминде Трамп өз ыйгарым укуктарынан ашып, өзгөчө кырдаалдарга арналган мыйзамды дүйнөлүк “өз ара” тарифтерди киргизүү үчүн колдонгону белгиленген.

Трамп бул чечимди “уят” деп атап, кошумча чаралар көрүлөрүн билдирген. Кийин ал бардык өлкөлөр үчүн 10 пайыздык кошумча бажы төлөмүн киргизүү тууралуу жарлыкка кол коюп, аны 15 пайызга чейин жогорулаткан.