Юн Сок Ёл өмүр бою эркинен ажыратуу өкүмүнө апелляциялык арыз жазды

Түштүк Кореянын мурдагы президенти Юн Сок Ёл сотко өмүр бою эркинен ажыратуу өкүмүнө каршы апелляциялык арыз менен кайрылды. Бул тууралуу Associated Press мурдагы мамлекет башчысынын адвокаттарына шилтеме кылып жазды.

Юн Сок Ёлдун юридикалык тобу кылмыштын фактыларын аныктоодо каталар кетирилген деп эсептейт. Алар ошондой эле аскердик абалга байланыштуу мыйзамды туура эмес чечмелөө болгон деген пикирде.

Айта кетсек, 19-февралда Түштүк Кореянын соту Юн Сок Ёлду 2024-жылы өлкөдө аскердик абалды киргизгени үчүн өмүр бою эркинен ажыратуу өкүмүн чыгарган. Январь айында ал камакка алууга тоскоолдук жараткан деген кине менен 5 жылга соттолгон. Ага каршы жалпысынан 8 кылмыш иши козголгон.

2024-жылдын декабрында Юн Сок Ёл өлкөдө аскердик абал киргизген. Бул чечим коомчулуктун нааразычылыгын жаратып, парламент аны тез арада алып салууга добуш берген. Акыры ал буйрукту алып салууга макул болгон. Андан кийин Түштүк Кореянын парламенти Юн Сок Ёлго импичмент жарыялаган.