Женевада АКШ менен Ирандын сүйлөшүүсү ийгиликсиз өткөнү айтылды 

Женевада өткөн Ирандын өзөктүк программасы боюнча АКШ менен Ирандын сүйлөшүүлөрүнүн үчүнчү айлампасы келишимсиз аяктаганы айтылды. Бул тууралуу чет элдик басылмалар жазышты.

Тараптар негизги маселелер боюнча бир пикирге келе алышкан эмес. Сүйлөшүүлөрдүн жүрүшүндө америкалык өкүлдөр Иран Фордо, Натанз жана Исфахандагы өзөктүк объекттерин жок кылып, калган байытылган уранды АКШга өткөрүп бериши керектигин талап кылышкан.

Мындай талаптарга Иран тарап макул болгон эмес. Иран өзүнүн уран корун чет өлкөгө өткөрүү идеясын четке кагып, уранды байытууну токтотуу, өзөктүк объекттерди демонтаждоо жана анын программасына чектөө киргизүүгө каршы экенин билдирген.

Белгилей кетсек, 26-февралда Женева шаарында АКШ менен Иран ортосунда өзөктүк программа боюнча Омандын ортомчулук кылуусу астында сүйлөшүүлөр өткөн.