Ооганстан Пакистанга каршы аскердик операциясын аяктаганын жарыялады

Кабул Пакистандын чек ара провинцияларындагы ири аскердик операциясын аяктады. Бул тууралуу Ооганстандын коргоо министрлигине таянып чет элдик басылмалар жазышты.

Жума күнү кечинде ооган куралдуу күчтөрү Пакистанга жооп иретинде өлкөнү экиге бөлүп турган Дюранда линиясынын боюндагы пакистандык күчтөрдүн борборлоруна жана объектилерине чабуулдук операцияларды баштаганын жарыялады. Кабул соккуларды "Пакистандын Ооганстандын аймагына жасаган агрессиясына" жооп катары баштаганы менен түшүндүргөн.

"Түн жарымында Ислам Эмирлигинин Куралдуу күчтөрүнүн Башкы штабынын башчысынын түздөн-түз буйругу менен аскердик операция ийгиликтүү аяктады", - деп жазылат мекеменин маалыматында.

Ооганстандын Коргоо министрлигинин маалыматына караганда, операциянын натыйжасында Пакистандагы эки аскерий базасы жана 19 аскерий пост басып алынган. Анын кесепетинен 50дөн ашык Пакистандын жаран каза тапканы айтылууда.

Ооган тараптан 8 аскер кызматкери каза болуп, 13ү жаракат алган. Мындан тышкары Нангархар провинциясындагы качкындар лагерине душмандын ракеталык чабуулунун натыйжасында 13 оогандык жай тургун, анын арасында балдар жабыр тартканы кабарланат.

26-февраль күнү кечинде ооган куралдуу күчтөрү Пакистандын чек ара провинцияларында чабуул коюучу аскердик операция башталганын жарыялаган.