Белгилүү армениялык мушкердин беттеши массалык мушташ менен коштолду (видео)

UFC уюмунун жеңил салмактагы рейтингинде экинчи орунда турган мушкер Арман Царукян менен америкалык Жоржио Пулластын беттеши массалык мушташка айланды. Алар АКШда RAF 06 турниринин алкагында беттешип, Царукян кармашта 5:3 эсебинде жеңишке жеткенин чет элдик басылмалар жазышууда.

Маалым болгондой, жыйынтык жарыялангандан кийин чыңалуу күчөп, Царукян атаандашын жыгып, бир нече сокку урган. Натыйжада экөөнүн тарапташтары массалык түрдө мушташты.

Спорт басылмалары Пуллас беттеш учурунда Царукянды кемсинткенин жазышууда. Мындан улам беттеш аяктаганда пикир келишпестик орун алган.

Эскерте кетсек, 29 жаштагы Царукян ММА боюнча профессионалдык карьерасында 23 жеңишке жетип, 3 жеңилүү ызасын тарткан. Анын 15 жеңиши мөөнөтүнөн мурда келген. Акыркы ирет уюмдун алкагында ал жаңы зеландиялык Дэн Хукерди жеңип, позициясын бекемдеген.