Ирандын соккусунан Кувейтте 27 аскер жаракат алды

Кувейттин аймагына Ирандын соккусунун кесепетинен улуттук армиянын 27 аскер кызматкери жаракат алды. Бул тууралуу өлкөнүн Коргоо министрлиги билдирди.

Маалым болгондой, өлкөнүн абадан коргонуу күчтөрү Ирандан 150дөн ашык ракетаны жана 350 учкучсуз учакты кармаган.

"27 аскер кызматкери жаракат алды. Алардын абалы туруктуу. Учурда экөө ооруканада дарыланууда",- деп айтылат маалыматта.

Мекеме армия күчөтүлгөн режимде экенин, абадан коргонуу күчтөрү аба мейкиндигин күнү-түнү көзөмөлдөп турганын баса белгилеген.

Белгилей кетсек, 28-февралда АКШ менен Израил Иран аймагында кеңири масштабдагы аскердик операция баштаган. Буга жооп катары Иран да операциясын баштап, Жакынкы Чыгыштагы америкалык аскердик базаларга жана Израилдин шаарларына сокку урган. Иран тараптан жасалган чабуулдардын кесепетинен Бириккен Араб Эмирликтери, Бахрейн, Ирак, Оман жана Перс булуңундагы өлкөлөр жабыркаган.

2-март күнү эртең менен ирандык маалымат каражаттары АКШнын Кувейттеги элчилигине жана Бахрейндеги америкалык базага сокку урулганын кабарлашкан.