Европада ядролук кызматташуу кеңейет: Польша демилгеге кошулду

Польшанын премьер-министри Дональд Туск өлкө ядролук коопсуздук маселесинде пассивдүү болууну каалабай турганын билдирди. Бул тууралуу чет элдик басылмалар жазышты.

Анын айтымында, Варшава бул тармакта союздаштары менен тыгыз кызматташат жана келечекте мүмкүн болушунча автономдуу аракеттенүүгө даярдык көрөт. Мунун алдында Эммануэль Макрон Франциянын “өнүккөн ядролук доктринага” сегиз европалык өлкө кошуларын маалымдаган. Алар: Улуу Британия, Германия, Польша, Нидерланды, Бельгия, Греция, Швеция жана Дания.

Тусктун белгилешинче, Польша Франция менен гана эмес, бул долбоорго чакырылган башка мамлекеттер менен да консультацияларды жүргүзүүдө. “Ядролук кармоо системи боюнча Франция менен сүйлөшүүлөрдү жүргүзүп жатабыз. Мындан тышкары, Польша менен бирге катышууга чакырылган өлкөлөр менен да кеңешүүлөр болууда”,- деди ал.

Премьер-министр март айында Париж шаарында өтө турган ядролук энергия боюнча саммитте бул маселени Макрон жана башка европалык өнөктөштөр менен талкуулоого ниеттенгенин кошумчалады.