Катар Ирандын чабуулдарына жооп кылууну карап жатканын билдирди

"Иран кызыл сызыктан өттү",- деп Катардын Тышкы иштер министрлигинин өкүлү Мажед аль-Ансари брифингде билдиргенин чет элдик басылмалар жазышууда.

Анын айтымында, Иран соккуларды бир гана АКШнын аскердик объекттерине эмес, Катар аймагына толугу менен жасаган. Чабуулдар "Доха" аэропортуна жана газ объекттерине да тийген.

"Биздин көз карандысыздыгыбызга кол салуулар тынымсыз болуп жатат. Инфраструктурага, турак жайларга сокку урулууда. Бул чабуулдардын кесепети айкын. Мүмкүн болгон жооп чаралары тууралуу айтсак, биздин жетекчилик бардык варианттарды карап жатат. Бирок биз так билдиришибиз керек: мындай чабуулдар жоопсуз калбайт",- деди ал.

Эскерте кетсек, 28-февралда АКШ президенти Дональд Трамп америкалык аскерлер Иранда аскердик операция баштаганын билдирген. Израил да республикага сокку урганын жарыялаган. Тегеран болсо жооп катары Жакынкы Чыгыштагы америкалык аскер базаларына сокку урган.