Улуттук демди даңазалаган тегерек стол өттү

Бүгүн, 4-мартта Улуттук тарых музейинде Кыргыз Республикасынын президентинин “Улуттук дем – дүйнөлүк бийиктик” уңгужолу жөнүндө жарлыгынын алкагында “Ак калпак жана улуттук кийим – улуттун улуу мурасы” аталышындагы тегерек стол өткөрүлдү. Бул тууралуу президенттик администрациядан билдиришти.

Маалыматка ылайык, иш-чарага мамлекеттик катчы Арслан Койчиев, окумуштуулар, маданият ишмерлери, этнодизайнерлер, кол өнөрчүлөр жана студенттер катышып, улуттук кийимдердин коомдогу орду тууралуу пикир алышты.

Арслан Койчиев өз сөзүндө ак калпак улуттук аң-сезимди калыптандырууда өзгөчө мааниге ээ экенин белгилеп, аны улуттун сыймыгы катары баалады. Ошондой эле заман талабына шылтап улуттук баалуулуктарды бурмалоого жол бербөө керектигин айтты.

Жыйынтыгында ал улуттук кайра жаралуу доорун бекемдеп, улуттук кийимдерди сактоо жана өнүктүрүү үчүн биргелешип аракеттенүүгө чакырды.