Египет, Оман жана Европанын айрым өлкөлөрү менен визалык жеңилдиктер кеңейет

Бүгүн, 9-мартта Жогорку Кеңештин Эл аралык иштер, коргоо, коопсуздук жана миграция боюнча комитетинин жыйынында дипломатиялык жана кызматтык паспорт ээлери үчүн визалык талаптарды өз ара алып салууга байланыштуу бир катар мыйзам долбоорлору каралып, жактырылды. Бул тууралуу Жогорку Кеңештин басма сөз кызматынан билдиришти.

Атап айтканда, Египет, Оман, Словения жана Бенилюкс мамлекеттери — Бельгия, Нидерланды, Люксембург менен түзүлгөн макулдашууларды ратификациялоо тууралуу мыйзам долбоорлору комитет тарабынан үч окууда колдоо тапты.

Тактап айтканда, төмөнкү документтер каралды:

• 2025-жылдын 18-июнунда Брюссел шаарында кол коюлган Кыргыз Республикасы менен Бенилюкс мамлекеттеринин ортосундагы дипломатиялык жана кызматтык/расмий паспорт ээлерин визадан бошотуу тууралуу макулдашуу;

• 2025-жылдын 16-октябрында Любляна шаарында кол коюлган Кыргыз Республикасы менен Словениянын ортосунда дипломатиялык паспорт ээлерин кыска мөөнөттүү визалардан өз ара бошотуу тууралуу макулдашуу;

• 2025-жылдын 25-сентябрында Нью-Йоркто кол коюлган Кыргыз Республикасы менен Оман Султанатынын ортосунда дипломатиялык, атайын жана кызматтык паспорт ээлерин визалык талаптардан бошотуу тууралуу макулдашуу;

• 2025-жылдын 4-ноябрында Каирде кол коюлган Кыргыз Республикасы менен Мисир Араб Республикасынын ортосунда дипломатиялык, кызматтык жана атайын паспорт ээлери үчүн визалык талаптарды жокко чыгаруу тууралуу макулдашуу.

Комитет мыйзам долбоорлорун колдоп, андан ары Жогорку Кеңештин кароосуна сунуштады.