Чүйдө баңгизаттарды мыйзамсыз жүгүртүүгө шектүү кармалды

Чүй облусунда баңгизаттарды мыйзамсыз жүгүртүүгө шектүү кармалды. Бул тууралуу 13-мартта облустун милициясынан билдиришти.

Маалыматка ылайык, милицияга Аламүдүн районунун Арашан айыл аймагында баңгизат табылганы тууралуу маалымат түшкөн.

Текшерүүнүн жүрүшүндө 2008-жылы туулган Р.А. аттуу жарандан психотроптук заттар аныкталып, алынган заттын жалпы салмагы 35 граммды түздү. Экспертизанын корутундусуна ылайык, алынган зат 4-СМС (хлорметкатинон, клэфедрон) камтып, психотроптук заттарга кирет.

Бул факт боюнча Кылмыш-жаза кодексинин 282-беренеси (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) боюнча кылмыш иши козголду.

Тергөө учурунда Нарын шаарынын А.Т. аттуу тургуну Telegram аркылуу "Принцесса-Дури" интернет дүкөнүнөн психотроптук затты 26 430 сомго сатып алгандыгы аныкталды.

Төлөм жүргүзүлгөндөн кийин А.Т. өзүнүн тууганы Р.А.дан Арашан айылына барып келүүнү суранган. Ал көрсөтүлгөн жерге барганда укук коргоо органдары тарабынан кармалып, убактылуу кармоо жайына киргизилди.

Учурда тергөө иштери улантылып жатат.