Бишкекте 38 жаңы трансформатор орнотулуп, 298и оңдолот

Бишкек шаары боюнча 6–10/0,4 кВ чыңалуусундагы 298 даана трансформатор оңдоп-түзөөдөн өткөрүлүп, кошумча 38 даана жаңы трансформатор орнотулат. Бул тууралуу 16-мартта Энергетика министрлигинен билдиришти.

Маалыматка ылайык, оңдоо иштеринин алкагында трансформаторлордун техникалык абалы текшерилип, эскирген тетиктери алмаштырылып, керектүү техникалык тейлөө иштери жүргүзүлөт.

Трансформаторлор төмөнкү РЭТтерде жаңыланат:

• Чыгыш РЭТ — 113 даана оңдолот, 25 даана жаңысы орнотулат;

• Батыш РЭТ — 100 даана оңдолот, 3 даана жаңысы орнотулат;

• Түндүк РЭТ — 85 даана оңдолот, 10 даана жаңысы орнотулат.

Белгилей кетсек, Бишкек электр тармактар ишканасынын балансында шаар боюнча жалпы 2 миң 248 даана трансформатор бар. Жылдын аягына чейин алардын баары оңдоп-түзөөдөн өткөрүлөт.