ИИМ май майрамдарында балдардын коопсуздугуна көңүл бурууга чакырат

Ички иштер министрлиги 1-10-май аралыгындагы узак эс алуу күндөрүндө ата-энелерди балдардын коопсуздугуна өзгөчө көңүл бурууга чакырды.

Майрам учурунда балдар көбүнчө көчөдө же чоңдордун көзөмөлүсүз жүрүшү мүмкүн болгондуктан, ИИМ ата-энелерге төмөнкүлөрдү эскертет: балдарды кароосуз калтырбоо, алардын кайда жүргөнүн билүү, жол эрежелерин түшүндүрүү, кооптуу буюмдарды кол жетпеген жерде сактоо, бейтааныш адамдардан сак болууга үйрөтүү, интернет коопсуздугун көзөмөлдөө жана суу жээгинде көзөмөлдү күчөтүү.

Мекеме ата-энелердин көңүл буруусу балдар катышкан кырсыктардын алдын алууда маанилүү экенин белгиледи.