Садыр Жапаров Сейшел аралдарынын тышкы иштер министрин кабыл алды

Президент Садыр Жапаров бүгүн, 5-майда Ысык-Көл облусунун Чолпон-Ата шаарында Сейшел аралдарынын тышкы иштер министри Барри Фор менен жолугушту. Бул тууралуу президенттик администрациядан билдиришти.

Маалыматка ылайык, жолугушууда Кыргызстан менен Сейшел аралдарынын ортосундагы эки тараптуу кызматташтык маселелери талкууланып, саясий диалогду чыңдоо, соода-экономикалык жана маданий-гуманитардык байланыштарды кеңейтүү багыттарына көңүл бурулду.

Ошондой эле инвестиция, туризм, финансы жана санариптик технологиялар жаатында кызматташуунун келечеги каралды. Тараптар “Тамчы” атайын каржылык-инвестициялык аймагы жана “Учкун” ААКсы менен байланыш түзүү мүмкүнчүлүктөрүнө кызыкдар экенин билдиришти.

Мындан тышкары, климаттын өзгөрүшү жана туруктуу өнүгүү сыяктуу эл аралык маселелер боюнча пикир алмашуу болуп, БУУ алкагында кызматташууну координациялоонун маанилүүлүгү белгиленди.

Жолугушуунун жыйынтыгында эки өлкө кызматташууну мындан ары да өнүктүрүүгө даяр экенин ырасташты.