Камчыбек Ташиевдин соту болбой калды

УКМКнын мурдагы төрагасы Камчыбек Ташиевдин иши боюнча бүгүн, 21-майда өтө турган сот жыйыны кийинкиге жылдырылды.

Анын адвокаты Икрамидин Айткулов журналисттерге кээ бир айыпталуучулар материалдар менен толук таанышып бүтпөгөнүн жана айрым жактоочулар тарабынан болгон даттануулар себеп болгонун билдирди. Бүгүн айтылуу "75 адамдын каты" боюнча иш каралмак.

Эске салсак, 18-майда Камчыбек Ташиев жана анын тарапташтарынын иши боюнча Бишкектин Биринчи Май райондук сотунда соттук угуу болгон. Ага УКМКнын мурдагы төрагасы келген эмес. Бүгүнкү отурумга анын келери күтүлүп жаткан болчу.

Белгилей кетүүчү нерсе, ИИМ аталган ишке "жашыруун" деген гриф койгон.

Ташиев Кылмыш-жаза кодексинин "Бийликти күч менен басып алуу же кармап туруу" жана "Кызмат абалынан кыянаттык менен пайдалануу" беренелери боюнча айыпталууда. Мындай беренелер менен Жогорку Кеңештин мурдагы төрагасы Нурланбек Тургунбек уулу менен экс-депутат Курманкул Зулушевге да айып тагылган.

Ал эми "75чилер" иши менен кармалган Бекболот Талгарбеков, мурдагы айыл чарба министри Эмилбек Узакбаев, Жогорку Кеңештин экс-депутаты Курманбек Дыйканбаев, мурдагы вице-премьер, экс-депутат Аалы Карашев жана ички иштер министринин мурдагы орун басары Курсан Асанов "Кызмат абалын кыянаттык менен пайдалануу" беренеси менен айыпталууда.