Чет жерде кыргызстандыктарды кылмышка тартуу көбөйгөнү айтылды

Акыркы убактарда кыргызстандыктарды чет мамлекеттерде кылмыш иштерине тартуу учурлары көбөйүп жатат. Бул тууралуу Тышкы иштер министрлиги билдирди.

Маалымдалгандай, кыргызстандыктар социалдык тармактар аркылуу жогорку айлык акыны убадалаган иштерге алданып калып жатышат. Негизинен ар кандай жумуштар сунушталганы менен чынында баңгизат таратууга мажбурлашат. Мындай тузакка түшүп калган кыргызстандыктар чет мамлекеттердин укук коргоо органдары тарабынан кармалууда.

Министрлик көп учурда алар кыргызстандыктарга паспорт даярдоого, жол киреге жана башка чыгымдарды жабууга алдын ала акча каражаттарын которуп беришерин белгиледи. Мекеме жарандарды чет өлкөдө тез жана жеңил киреше табуу боюнча сунуштарга алданбоого чакырды.