Трамп: “Иранга ядролук курал жасоого жол берилбейт”

АКШнын президенти Дональд Трамп Иран менен болочокто түзүлө турган келишим өлкөгө ядролук курал иштеп чыгууга мүмкүнчүлүк бербейт деп билдирди.

“Бул келишим мурдагы ийгиликсиз келишимге таптакыр окшобойт. Ал келишим Иран үчүн ядролук куралга түз жол ачкан”,- деп жазды Трамп Truth Social социалдык тармагында.

Анын айтымында, АКШ Ирандын ядролук куралга ээ болушуна жол бербеген жаңы форматтагы келишимди көздөйт.

Белгилей кетсек, Ирандын өзөктүк программасын жөнгө салган эл аралык келишимдер учурда жок. 2015-жылы бул багыттагы Иран жана АКШ, Орусия, Кытай, Франция, Германия жана Улуу Британиянын ортосунда түзүлгөн келишими 2025-жылдын октябрь айында күчүн жоготкон.