Дайырбек Орунбеков "Enigma" тобунун вокалисти Эндрю Андерсон менен жолугушту

Бүгүн, 26-майда президенттик администрациянын өкүлү Дайырбек Орунбеков өлкөгө иш сапары менен келген дүйнөгө белгилүү "Enigma" тобунун вокалисти Эндрю Андерсон менен жолугушту.

Өкмөттүн маалымат кызматы кабарлагандай, Орунбеков өлкөдө жетишилген экономикалык туруктуулук жана динамикалуу өнүгүү республиканы инвесторлор үчүн гана эмес, көрүнүктүү маданият ишмерлери үчүн да жагымдуу борборго айлантып жатканын белгиледи.

"Бүгүн Кыргызстан дүйнөгө толугу менен ачык. Өлкөнүн ишенимдүү өнүгүшү бизге эл аралык аренада өзүбүздү активдүү таанытууга мүмкүндүк берет. Дүйнөлүк аудитория Кыргызстан жөнүндө расмий билдирүүлөрдөн гана эмес, сиз сыяктуу көрүнүктүү инсандардын жеке таасирлери аркылуу да билиши биз үчүн өтө маанилүү. "Enigma"нын чыгармачылыгы - терең жана гармониялуу - биздин өлкөнүн алгачкы кооздугуна жана рухуна укмуштуудай үндөшүп турат",- деп билдирди Орунбеков.

Өз кезегинде Эндрю Андерсон жылуу кабыл алгандыгы үчүн ыраазычылык билдирип, Кыргызстандагы өзгөрүүлөргө таң калганын белгиледи. Ал жергиликтүү тургундардын ачыктыгын жана меймандостугун өзгөчө белгиледи.